روزنامه چراغ

په دې وروستيو كې د سولې پنګانو(ناټو) يو ځل بيا زمونږ ډېر شمېر هېوادوال په خپلو وينو كې ولمبول، دغو ځواكونو هغه وخت په لسګونو بې ګناه وګړي د خپلو ړندو مردكيو ښكار كړل چې په دوى باندې يو ځانمرګى بريد تر سره شو.

كه ښه ځير شو نو دا به راته ډېر ژر په ډاګه شي چې دغو ځواكونو څوڅو ځله زمونږ بې ګناه وګړي د مرګ كومي ته سپارلي، خو دوى يوازې د پلټنې په پلمه ځان خلاس كړى او پلټنې يې اوس هم روانې دي.

له دې سره جوخت په وار، وار، سره له دې چې دوى ته په ډاګه شوې چې تر بريد لاندې خلك هيڅ ګناه نه لري، خو دوى ډزې پرې كړي او وژلي يې دي.

دا په داسې حال كې ده چې د دولت مخالفو وسلوالو د پسرلنيو بريدونو ګواښ كړى او ويلي يې دي چې د هوا له تودېدو سره سم به خپلو بريدونو ته زور وركړي.

اوس اوس داسې مالومېږي چې له څه مودې راهيسي پرله پسې بريدونه تر سره كېږي او ډېرى يې ځانمرګي بريدونه دي. خو ددغو ګواښونو په وړاندې ليدل كېږي چې د ناټو ځواكونو هيڅ ډول چمتوالى نه دى ښودلى او په خورا كمزوري حالت كې شپې سبا كوي.

دغه ځواكونه وايي چې د ولس مرسته ډيره اړينه ده، نو آيا په داسې يوه ناوړه عمل به ولس له دوى سره مرسته وكړي؟

څنګه كېداي شي چې يو څوك دې له خپل قاتل سره لاس يوكړي او د هغوى مرستې ته دې ور ودانګي. دغه تش په نامه تېروتنې د لومړي ځل لپاره نه بلكې په لسهاوو ځله تكرار شوي چې د قربانيانو خويندې او ميندې اوس هم د غم په تاوده ټغر ناستې دي او د افغان دولت يوه چارواكي هم ونه شواى كړاى چې د هغوئ په ټپونو مرهم كېږدي او اوښكې يې وچې كړي.

له روان حالت څخه داسې مالومېږي چې د سوله ساتو سرتېرو دنده يواځې دا ده چې د خلكو كركه را وپاروي، هغوى ووژني او ويې ځوروي.

د ناټو ځواكونو دا عمل به د دولت د مخالفو وسلوالو ډلې لا پسې پياوړې كړي او خلك به له دوى سره د مرستې پر ځاى ددوى په وړاندې خپله كركه په ډاګه كړي.

دغو ځواكونو نه يواځې دا چې د بشري حقونو څخه سرغړونه كړې، دوى پخپل دغه جنايت هم پرده غوړولې، ځكه له پېښې وروسته د سولې دې خادمانو له ژورنالستانو سره ډېر بد چلند كړى، هغوى يې وهلي او ډبولي دي او هان ددوئ له كمرو څخه يې د پېښې انځورونه پاك كړي چې دا هم د بيان د آزادۍ په وړاندې يوه لويه بد اخلاقي اوبدماشي ده.

اوس نو پكار ده تر څو افغان حكومت ملي شورا، د بشري حقونو نړېوال سازمان اوهغو ملكونو چې د بيان د آزادۍ او بشري حقونو نارې وهي د پېښې ريښتينې پلټنه وكړي او پړه كسان ژر تر ژره پخپله سزا ورسوي.

او كه نه خلك حق لري، ووايي چې نور نو بايد د افغانستان د دولت لوړ مقام خپل دريځ په ډاګه كړي، په دې مانا چې دغه مقام دې يا د ناټو په همدې نادودو سترګې پتې كړي او يا دې د خپلو خلكو تر څنګ ودرېږي.